Pas nënshkrimit të Memorandumit të Bashkëpunimit me Akademinë e Gjykatësve dhe Prokurorëve Publikë, Kryetari i Gjykatës Kushtetuese, dr.Darko Kostadinovski, mbajti sot konferencë shtypi në të cilën iu përgjigj të gjitha pyetjeve të gazetarëve. Më poshtë janë disa nga përgjigjet:
Për zgjedhjen e prof.dr.Goce Naumovski si gjykatës i ri kushtetues:
“Në gjyqësorin kushtetues ekzistojnë disa lloje gjykatësish, të cilët kanë qasje të ndryshme për interpretimin e vetë Kushtetutës. Ka nga ata që ne i quajmë restriksionistë që i përmbahen drejtpërdrejt çdo shkronje të tekstit të Kushtetutës, tekstualistë – të cilët e interpretojnë Kushtetutën mekanikisht, por ka edhe gjykatës që e interpretojnë atë në kuptimin e saj më të gjerë të mundshëm dhe unë jam një nga këta gjykatës. Kur njerëzit vijnë nga bota akademike, nga fakultetet, për mua, ky është një lajm i mirë për gjyqësorin kushtetues. Sa i përket të qenit këshilltar i kryeministrit, unë isha këshilltar i tre presidentëve të vendit. Kryerja e detyrës është pjesë e karakterit dhe besueshmërisë së një personi. Nëse ai ka qenë këshilltar i një kryeministri apo unë i tre presidentëve, kjo nuk ka rëndësi. Puna jonë vlerësohet pikërisht në këtë sallë. E kam thënë shumë herë, të gjashtë librat e mi i kushtohen besnikërisë ndaj Kushtetutës. Unë jam besnik ndaj Kushtetutës dhe askujt tjetër. Edhe këtë e pres nga kolegu i ri nëse zgjidhet, si dhe nga ai tjetri që duhet të zgjidhet, por edhe nga gjykatësit e deritanishëm”.
Për propozimin e BDI-së të ketë Badenter edhe në Gjykatën Kushtetuese:
“Unë tashmë e kam shprehur qëndrimin tim për këtë çështje. Parimi i Badenterit është një parim shumë i rëndësishëm, por për organet politike si Kuvendi, ku miratohen ligje, ku bëhen ndryshime dhe plotësime të ligjeve. Gjykata Kushtetuese nuk është organ politik. Nëse në Gjykatën Kushtetuese do të zbatohej parimi i Badenterit, kjo do të nënkuptonte se për kushtetutshmërinë dhe ligjshmërinë, si dhe për liritë dhe të drejtat e njeriut dhe të qytetarëve, nuk do të vendosnin argumentet juridike, por lloje të tjera arsyetimesh. Nuk ekziston një gjë e tillë askund në botë. Dhe për këtë arsye isha pak më i ashpër në kuptimin që nëse ndodh diçka e tillë, është më mirë që ky institucion të vërë drynin. Nuk do të ketë nevojë që ky institucion të ekzistojë, në qoftë se diçka e tillë parashikohet këtu. Ligjet dhe zbatimi i tyre nënkuptojnë garanci për liritë dhe të drejtat e çdo qytetari, edhe të komuniteteve që nuk janë shumicë. Ky është kuptimi i parimit të Badenterit. Nëse më pyesni mua personalisht, mendoj se parimi i Badenterit nuk ka vend as në Këshillin Gjyqësor, sepse ekzistojnë kritere të tjera atje. Kur udhëhiqesh nga parimi i Badenterit, nuk ka më argumente juridike. Vendimet do të përcaktohen nga lloje të tjera argumentesh”.
Lidhur me lëndën në të cilën kontestohet Ligji për Përdorimin e Gjuhëve:
“Pres që Gjykata Kushtetuese të kompletohet shumë shpejt dhe çështja, natyrisht do të iniciohet menjëherë në takimin e parë të punës. Kemi ardhur në përfundim se duhet të mbahet një seancë përgatitore. Kjo gjë nuk është ndryshuar dhe asnjë nga gjykatësit nuk ka kërkuar që të ndryshohet. Tek ne, një vendim merret me pesë vota. Ndoshta ndonjë gjykatës do të propozojë se nuk ka nevojë për seancë përgatitore dhe në këtë mënyrë ai propozim do të shkojë në votim. Tani për momentin, përfundimi se duhet të mbahet një seancë përgatitore është ende në fuqi dhe duhet të mbahet, nëse pyetem unë, sepse ishte propozimi im. Pse është mirë? Ne kemi marrë tashmë një qëndrim për atë seancë përgatitore, do të transmetohet drejtpërdrejt, çdo qytetar do të jetë në gjendje të shohë në telefonin e tij se çfarë po diskutojmë në thelb”.
Lidhur me kërkesën që provimi i jurisprudencës të jepet në gjuhën shqipe, në kontekstin e kushtetutshmërisë:
“Nuk dua të prejudikoj asgjë dhe do të përmbahem nga komentimi i kësaj teme, sepse ekziston lëndë për Ligjin për Përdorimin e Gjuhëve”.