108/2007-0-0

Уставниот суд на Република Македонија, врз основа на членовите 110 и 112 од Уставот на Република Македонија и член 70 од Деловникот на Уставниот суд на Република Македонија (“Службен весник на Република Македонија” бр.70/1992) на седницата одржана на 16 јануари 2008 година, донесе

1. СЕ УКИНУВА Одлуката за донесување на Детален урбанистички план за дел од УЕ “Трета МУБ” Урбан модул помеѓу улиците “Миле Кипра”, “Перо Чичо” и “Перо Шварц” – општина Куманово, број 07-9695/6 од 20 декември 2006 година донесена од Советот на општина Куманово („Службен гласник на општина Куманово“ број 22 од 22 декември 2006 година).

2. СЕ СТАВА НАДВОР ОД СИЛА решението за запирање од извршување на поединечните акти и дејствија донесени, односно преземени врз основа на Одлуката означена во точката 1 од оваа одлука.

3. Оваа одлука ќе се објави во „Службен весник на Република Македонија“.

4. Уставниот суд на Република Македонија, по повод иницијативата на Стојанчо Величковски, Чедомир Величковски и Милутин Величковски од Куманово, изјавена преку полномошникот Момчило Доцевски, адвокат од Куманово, со Решение У.бр.108/2007 од 28 ноември 2007 година поведе постапка за оценување на законитоста на Одлуката означена во точката 1 од оваа одлука, затоа што се постави прашањето за нејзината согласност со Законот за просторно и урбанистичко планирање. Истовремено, Судот го запре извршувањето на поединечните акти и дејствија донесени, односно преземени врз основа на оспорената одлука, до донесување на конечна одлука на Судот.

5. Судот на седницата утврди дека Советот на општина Куманово на седница одржана на 20 декември 2006 година ја донел Одлуката за донесување на Детален урбанистички план за дел од УЕ “Трета МУБ” Урбан модул помеѓу улиците “Миле Кипра”, “Перо Чичо” и “Перо Шварц” во општина Куманово, под број 07-9695/6.

Во членот 1 од Одлуката е утврдено донесувањето на планот, а во членот 2 се определува дека составен дел од планот се текстуалниот дел и синтезниот графички приказ на планските решенија.

Во членот 3 од Одлуката е уредено дека Одлуката се заверува во најмалку седум примероци со потпис и печат на градоначалникот на општината Куманово, и се чува по еден примерок во Архивот на општината и Државниот архив во Секторот за урбанизам и комунални дејности и заштита на животната средина и природата во општина Куманово, во Секторот за инспекциски работи, во Државниот завод за геодетски работи и еден примерок се чува кај донесувачот на планот.

Според членот 4 оваа одлука влегува во сила осмиот ден од денот на објавувањето во Службен гласник на општина Куманово.

Одлуката била објавена во Службен гласник на општина Куманово број 22 од 22 декември 2006 година.

6. Законот за просторно и урбанистичко планирање („Службен весник на Република Македонија“ бр.51/2005), согласно членот 1, ги уредува условите и начинот на системот на просторното и урбанистичкото планирање, видовите и содржината на плановите, изработувањето и постапката за донесување на плановите, спроведувањето и следењето на реализацијата на плановите, надзорот и другите прашања од областа на просторното и урбанистичкото планирање.

Врз основа на одредбите од овој закон била водена постапката за донесување на оспорениот план која со иницијативата се оспорува од аспект дека постапката не била спроведена во согласност со Законот.

Со оглед на тоа, од уставносудската анализа на постапката за донесување на планот усвоен со оспорената одлука, се утврди дека:

– Нацрт-планот бил изработен од “Урбан Гис” ДОО-Куманово со технички број 2/5, била извршена стручна ревизија од Јавното претпријатие – “Проект” од Штип во 2005 година и нацрт-планот бил содржан во годишната програма за 2006 година за изработување на планови, ова согласно членовите од 17 до 21 од Законот кои ги уредуваат прашањата на стручните лица со лиценца за изработка на планови и за вршењето на стручната ревизија на нацрт-плановите.

– Министерството за транспорт и врски дало стручно мислење под број 13-3169 од 17 февруари 2006 година за нацрт-планот во кое утврдило дека тој е изработен согласно со Законот, Правилникот за поблиска содржина и начинот на графичка обработка на плановите и за начинот и постапката за донесување на урбанистички планови (“Службен весник на Република Македонија” бр.2/2002), Правилникот за стандарди и нормативи за уредување на просторот (“Службен весник на Република Македонија” бр.2/2002 и 50/2003) и Правилникот за стандарди и нормативи за проектирање на објекти (“Службен весник на Република Македонија” бр.69/1999, 102/2000 и 2/2002) и Советот на општината Куманово донело Одлука број 07-2974/5 од 27 април 2006 година за утврдување на Нацрт-планот, ова согласно членот 24 став 2 од Законот според кој советот го утврдува нацрт-планот по кое организира јавна анкета и јавна презентација;

– Градоначалникот на општина Куманово донел Одлука број 08-879/3 од 26 јуни 2006 година за организирање на јавна анкета и јавна презентација по нацрт-планот, во која меѓу другото определил дека ќе биде објавено соопштение во јавни гласила за траење на јавната анкета во период од 15 дена и за излагање на нацрт-планот на јавно место со можност на граѓаните да даваат забелешки на анкетни листови.

Судот утврди дека во соопштението наменето за граѓаните било наведено дека графичкиот и текстуалниот прилог на предметниот Нацрт-план ќе се истакнеле на општинските табли на градскиот плоштад, и ова соопштение ќе се објавело во дневен весник за известување на граѓаните дека јавниот увид ќе траел од 30 јуни до 15 јули 2006 година.

Стручна комисија на општината изработила извештај број 21-879/4 од 16 јули 2006 година дека била спроведена јавна анкета и јавна презентација на Нацрт-планот, и изготвила посебно известување број 21-879/5 од 16 октомври 2006 година дека доставените приговори биле прифатени по што бил даден Предлог-план.

Меѓутоа, тие не содржат податоци за бројот на граѓаните со нивни податоци, кои поднеле приговори на анкетни листови за да се согледа дали и колкав бил повикот и одразот на Нацртот на планот на граѓаните, а прилогот од два анкетни листа со известувања дека приговорите бил прифатени, не значи и дека соопштението за јавната анкета било правилно и законито спроведено. Соопштението не покажува дека е извадок од „Утрински весник“ или друг весник и од кој датум е весникот, поради што Судот оцени дека тоа не е соодветно објавено во јавниот печат. Воедно, нема никаков доказ дека соопштението било објавено во јавни гласила, односно телевизиски презентирано, како што доносителот на оспорениот акт тврди со приложеното писмено барање од 29 јуни 2006 година до РТК Куманово за телевизиско известување во врска со јавната анкета и јавна презентација на Нацртот на планот.

Оттука Судот утврди дека нема докази во списите за овој дел од постапката од донесувањето на предметниот план, во однос на тоа дали нацрт-планот бил објавен во јавниот печат и јавните гласила, дали бил изложен на јавно место кое се наоѓа во кругот на месната самоуправа во траење од 15 работни дена и дали граѓаните имале можност да извршат увид на нацрт-планот, ниту може да се утврди дали на граѓаните им било овозможено да поднесат приговори на анкетни листови и да бидат ценети од стручна комисија на градоначалникот на општината. Овие дејствија од постапката се прецизно уредени со ставовите од 1-10 од членот 24 од Законот.

Со оглед на изнесената правна и фактичка состојба, Судот утврди дека оспорената Одлука не е донесена во постапка предвидена со Законот за просторно и урбанистичко планирање на што и се однесуваат наводите во иницијативата со кои се оспорува законитоста на спроведената постапка.

Во однос на согласноста на оспорената Одлука со правилникот на кој се повикуваат подносителите во иницијативата, Судот не е надлежен да ја оценува нивната меѓусебна согласност, поради тоа што согласно членот 110 од Уставот на Република Македонија, Судот одлучува за согласноста на законите со Уставот и за согласноста на другите прописи и на колективните договори со Уставот и со закон.

7. Врз основа на изнесеното, Судот одлучи како во точките 1 и 2 од оваа одлука.

8. Оваа одлука Судот ја донесе во состав од претседателот на Судот д-р Трендафил Ивановски и судиите Лилјана Ингилизова-Ристова, Вера Маркова, Бранко Наумоски, Игор Спировски и д-р Зоран Сулејманов.

У.бр.108/2007
16 јануари 2008 година
С к о п ј е
лк

ПРЕТСЕДАТЕЛ
на Уставниот суд на Република Македонија
д-р Трендафил Ивановски