Вовед
Уставниот суд на Република Македонија, врз основа на член 110 од Уставот на Република Македонија и членовите 71 и 27 од Деловникот на Уставниот суд на Република Македонија (“Службен весник на Република Македонија” бр.70/92), на седницата одржана на 9 мај 2001 година, донесе
Р Е Ш Е Н И Е
Текст
1. НЕ СЕ ПОВЕДУВА постапка за оценување законитоста на Одлуката за усвојување на Генералниот урбанистички план за универзитетски комплекс во град Тетово, донесена од Советот на општина Тетово на 5 Февруари 2001 год.
2. Томислав Стојановски – Бомбај од Тетово на Уставниот суд на Република Македонија му поднесе иницијатива за поведување постапка за оценување законитоста на одлуката означена во точка 1 од ова решение, затоа што за усвојување на Генерален урбанистички план било потребно спроведување на јавна анкета што во конкретниот случај не била направена.
Според наводите од иницијативата со оспорената одлука се повредени повеќе законски одредби кои не биле земени во предвид при донесување на одлуката; во спроведената стручна расправа не бил повикан претставник на средното земјоделско училиште “Моша Пијаде”- Тетово како сегашен корисник на земјиштето, ниту пак претставници на претпријатијата од град Тетово, кои со закон се задолжени да изработуваат планови; не може да биде јавен интерес кога се работи за изградба на приватен колеџ, а за сметка на него, згаснува средното државно училиште “Моша Пијаде” – Тетово со седумдесет и три годишна традиција со 2300 ученика и 220 вработени; во склопот на средното земјоделско училиште “Моша Пијаде” – Тетово, функционираат фарма со 120 молзни крави, 300 свињи, 400 товни јуниња, ком-плетна земјоделска механизација и работилница за нејзино одржу-вање, автономен систем за наводнување и други инфраструктурни објекти, кои се изградени со сопствени средства на училиштето, (вклучувајќи и комерцијални кредити) без користење на буџетски средства; земјиштето кое се одзема и доделува на приватниот колеџ, било неплодно и во текот на 73 години со огромни инвестиции и ангажирање на генерации ученици и вработени, е претворено во високо – квалитетно обработливо земјиште со приноси од две жетви во годината; неспоиво било во еден исти круг да се реализира настава на малолетни средношколци и возрасни студенти, што е спротивно на педагошките норми, а исто така е во колизија со она што значат социолошки, хумани, психолошки и безбедносни фактори; нормативот за средно – земјоделски и ветеринарни училишта од овој капацитет, предви-дува минимум 40 хектари земјоделски површини, што со оваа одлука се сведуваат само на 6 хектари; вредноста на земјиштето кое што се одзема во овој реон има пазарна вредност од 24 милиони германски марки, што значи подарени неповратни средства на приватни лица; во одлуката не е нагласено од кого се одзема земјиштето и на кого се доделува и нема урбанистичка согласност од Министерството за транспорт и врски, а работите на приватниот колеџ (само со поставување на Билборд) се започнати без градежна дозвола.
Истовремено со иницијативата се бара Судот да донесе времена мерка.
3. Судот на седницата утврди дека Советот на општина Тетово на седницата одржана на 27 октомври 2000 година донел Одлука за утврдување на нацрт – генерален урбанистички план за Универзитетски комплекс во град Тетово како почеток на постап-ката за донесување на оспорената одлука.
По донесување на одлуката за усвојување на нацрт-генералниот урбанистички план, врз основа на член 17 од Законот за просторно и урбанистичко планирање и член 88 од Статутот на општина Тетово, главниот архитект на градот, во име на локалната самоуправа организирал стручна расправа. Во овој акт е предвиде-но дека согласно член 22 и 23 од Законот за просторно и урбанистичко планирање на 28 декември 2000 година во салата на Собранието на општина Тетово со почеток во 10 часот ќе се одржи стручна расправа по нацрт Генералниот урбанистички план за Универзитетски комплекс во Тетово и Генералниот урбанистички план за стопански комплекс – угостителско рекреативен центар.
На стручната расправа требало да учествуваат прет-ставници на органи и организации опфатени со планот, јавни претпријатија и слично.
На 28 Декември 2000 година е организирана стручна расправа по нацрт-Генералниот урбанистички план за универзитет-ски комплекс и нацрт Генералниот урбанистички план за стопански комплекс- угостителски рекреативен центар на која присуствувале: главниот архитект на град Тетово; советник на градоначалникот за работи од инфраструктурата; Градоначалникот на Општина Тетово; Секретарот на Општина Тетово; претставници на ЈП за ПУП Подружница Гостивар; претставник на “Телекомуникации” – ПЕ Тетово; претставник на Министерство за земјоделие – ПЕ Тетово; претставник на Министерство за сообраќај – ПЕ Тетово; претставници на Министерство за транспорт и врски – ПЕ Тетово; претставници на ЈП за ПУП Подружница Тетово; претставници на ЕСМ Подружница Тетово; претставник на Геодетска управа Тетово; претставник на ЈП “Геоинжињеринг” Тетово; претставник на ЈКП “Тетово” Тетово; претставник на Фондот за локални патишта Тетово; претставници на Фондот за магистрални и регионални патишата – Скопје; Алајдин Абази, директор на Кредитна банка – Скопје и претставници на ЈП за ПУП Скопје.
По одржаната стручна расправа изготвен е извештај од стручната расправа.
Исто така Судот утврди дека согласно одредбите на Законот за просторно и урбанистичко планирање е извршена стручна ревизија од страна на институтот за просторно планирање, урбанизам, сообраќај и екологија на Македонија, “ИНПУМА” Скопје.
Стручната ревизија за Генералниот урбанистички план за универзитетски комплекс во Тетово дало Јавното претпријатие за просторни и урбанистички планови, како изработувач на планот. Во одговорот на стручната ревизија дадени се одредени забелешки и сугестии.
Исто така Судот утврди дека по нацрт Генералниот урбанистички план за универзитетски комплекс, а по барање на Советот на општина Тетово е добиено стручно мислење за нацрт планот од Министерството за транспорт и врски.
По спроведената постапка Советот на општина Тетово на 5.02.2001 година ја донел оспорената одлука за усвојување на Генералниот урбанистички план за универзитетски комплекс во Тетово.
Имено оспорената одлука е донесена согласно член 10 став 1 и член 22 став 3 од Законот за просторно и урбанистичко планирање.
Во член 1 од одлуката е предвидено дека со оваа одлука се усвојува Генералниот урбанистички план за универзи-тетски комплекс во град Тетово, кој што ќе се гради на КП.бр. 8061, 8062, 8064/1, 8064/2, во ПЛ.бр. 3522 на КО-Тетово, што е во согласност на Генералниот урбанистички план на град Тетово, кои катастарски парцели се наменети за објекти од јавен интерес за образованието и културата.
Сообраќајницата западно од булеварот “Илинденска” ќе се реши во дополнителна постапка.
Во член 2 од одлуката е предвидено дека составен дел на оваа одлука е техничката документација изработена од страна на Јавното претпријатие за просторни и урбанистички планови на Република Македонија – Скопје, кој што не се објавува, а две копии ќе се чуваат во Министерството за транспорт и врски ПЕ-Тетово и две копии кај Главниот архитект на град Тетово.
Во член 3 е предвидено дека одлуката влегува во сила со денот на објавување во “Службен гласник на општина Тетово”.
По донесувањето на одлуката Советот на општина Тетово поднел образложено барање 20-206/1 од 6 февруари 2001 год. до Министерството за транспорт и врски за издавање согласност за спроведување на Генералниот урбанистички план за универзитетски комплекс во Тетово.
Министерството за транспорт и врски согласно Законот за просторно и урбанистичко планирање а по извршениот увид во списите за спроведената постапка на 9 февруари 2001година издало Согласност за спроведување на Генералниот урбанистички план.
4. Според член 7 од Законот за просторно и урбанистичко планирање во зависност од просторот кој е предмет на планирање се донесуваат, покрај другото и Генерален урбанистички план.
Генералниот урбанистички план се донесува за под-рачје на населено место, стопански комплекс и за други подрачја предвидени за градба (член 10 став 1).
Генералниот урбанистички план содржи особено: намена на земјиштето и функционална организација на намената на подрачјето опфатено со планот, со граници на опфатот на урбаното подрачје, решенија за генерални водови и објекти на сообраќајна и друга инфраструктура, основни услови за изградба на стамбени, стопански, јавни, спортско – рекреативни и други објекти, градежни и регулациони линии и максимални висински коти, плански мерки за заштита и унапредување на животната средина и природата, природното и градителското наследство, урбани санациски мерки и мерки за заштита од воени разурнувања, природни и технолошки непогоди, одредби за спроведување на планот, билансни показатели и соодветни графички прикази.
Во член 15 од Законот е предвидено дека за израбо-тување на плановите од член 7 (во кој е предвиден Генералниот урбанистички план) Владата основа јавно претпријатие, кое покрај другите планови ги изработува и урбанистичките планови.
Понатаму, во член 17 е предвидено дека плановите од член 7 на овој закон се изработуваат како нацрт и предлог на план.
По нацрт на просторниот план на Републиката, просторните планови на регион, национален парк, на град Скопје и на општина, Генералниот урбанистички план како и за урбанистички план за граничен премин и за локалитет со објекти од јавен интерес, се организира стручна расправа со учество на претставници на органите и организациите од подрачјето опфатено со планот.
Според член 17 став 5 од Законот, стручната расправа по просторниот план на општина и на град Скопје и по Генералниот урбанистички план, како и јавната анкета по Деталниот урбанистички план и урбанистичката документација за населено место во општината, ги организира општината, односно градот Скопје.
Според член 18 став 4 извештај за стручната расправа и јавната анкета за плановите од член 17 став 5 со образложение за неприфатените забелешки изработува општината односно градот Скопје.
Според член 19 од Законот, по нацрт на плановите од член 7 на овој закон пред организирање на стручна расправа и јавна анкета се врши стручна ревизија.
Сручната ревизија на просторните и урбанистичките планови ја врши стручна научна институција или комисија што ја определува министерството надлежно за работите на урбанизмот.
Според член 22 став 3, општината донесува урбанистички планови од член 7 точка 2 алинеи 1, 2 и 3 на овој закон (Генерален урбанистички план, Детален урбанистички план и урбанистичка документација за неселено место во општината).
Во член 22 став 6 на овој закон е предвидено дека урбанистичките планови од ставот 3, 4 и 5 на овој член, можат да се спроведуваат по издавање на согласност од Министерството надлежно за работите на урбанизмот.
5. Со оглед на изнесеното произлегува дека Одлука за усвојување на Генералниот урбанистички план е донесена во постапка предвидена со закон, поради што Судот оцени дека не може да се постави прашањето за нејзината согласност со Законот за просторно и урбанистичко планирање, поради што одлучи како во точка 1 од ова решение.
6. По однос на барањето за запирање од извршување на поединечните акти и дејствија донесени односно преземени врз основа на донесената одлука, Судот смета дека со оглед на тоа што нема основ за поведување на постапка за оценување законитоста на оспорената одлука, не се исполнети услови од член 27 од Деловникот на Уставниот суд на Република Македонија за изрекување на времена мерка.
7. Ова решение Судот го донесе во состав од претседателот на Судот д-р Тодор Џунов и судиите Бахри Исљами, д-р Никола Крлески, Олга Лазова, д-р Стојмен Михајловски, д-р Милан Недков, д-р Јован Проевски, Бесим Селими и д-р Јосиф Талевски.
У.бр.28/2001
9 мај 2001 год.
Скопје
л.а
ПРЕТСЕДАТЕЛ
на Уставниот суд на Република
Македонија
д-р Тодор Џунов