Почитувани,
Во периодот од 21 до 25 февруари до Уставниот суд беа поднесени три иницијативи по кои беа оформени следните предмети:
У.бр.16/2022
Подносител: Нехат Љужа
Се оспорува уставноста на ставовите 2,3,4,5 и 6 од членот 9 од Правилникот за членување, права и обврски за членот и престанување на членството во Македонскиот полициски синдикат. Подносителот смета дека овие одредби се спротивни на член 20 став 2 од Уставот, според кој граѓаните можат слободно да основаат здруженија на граѓани, политички партии, да пристапуваат и од нив да истапуваат. Со оспорените одредби според подносителот се условува истапување од било какво здружение на граѓаните, а во кои спаѓаат и синдикатите како посебна форма на здружување на граѓаните-работници.
У.бр.17/2022
Подносител: Перица Јакимовски
Се оспорува членот 9 ставовите 1 и 3 од Законот за фондот за осигурување на депозити. Според подносителот со оспорената одредба се ограничува сопственоста, односно депозит до 30.000 евра и депозит над 30.000 евра, но за депозитот над 30.000 евра нема правна сигурност (Закон за стечај) и не се гарантира праведен надомест кој не може да биде понизок од пазарната вредност, односно во случајот над 30.000 евра.
У.бр.18/2022
Подносител: Јоне Ивановски
Се оспорува Правилникот за начинот на службено оценување на активниот воен персонал, активниот резервен персонал и за офицерите односно подофицерите и војниците во резервниот состав на Армијата на РСМ, начинот на водење на евиденција потребна за службено оценување и видовите на обрасците на оценувачкиот лист („Службен весник на РСМ” бр.156 од 09.07.2021). Според подносителот содржината на Правилникот излегува надвор од прецизните овластувања утврдени во Законот за служба во Армијата и се во спротивност со темелните вредности на уставниот поредок утврдени во член 8 алинеи 1 и 3 од Уставот. Подносителот бара Уставниот суд да го поништи Правилникот поради штетни последици кои според него ќе бидат предизвикани врз воениот персонал, односно врз нивниот успех во службата, одлучувањето за унапредување, поставување и други осноси во службата.