Вовед
Уставниот суд на Република Македонија, врз основа на член 110 од Уставот на Република Македонија и член 71 од Деловникот на Уставниот суд на Република Македонија („Службен весник на Република Македонија“ бр.70/1992), на седницата одржана на 24 април 2013 година, донесе
Р Е Ш Е Н И Е
Текст
1. НЕ СЕ ПОВЕДУВА постапка за оценување на уставноста на член 4 став 1 точка 1 во делот
2. Кузман Дамчевски од Скопје до Уставниот суд на Република Македонија поднесе иницијатива за поведување на постапка за оценување на уставноста на одредбата од Правилникот означена во точката 1 од ова решение.
Во иницијативата се наведува дека оспорената одредба од Правилникот не била во согласност со член 7 став 1 од Уставот со оглед дека наведената ознака „POLICE“ била напишана само на латинично писмо и на англиски јазик. Според наведената уставна одредба, во Република Македонија службен јазик е македонскиот јазик и неговото кирилско писмо.
Во иницијативата се наведува дека Единицата за безбедност на сообраќајот на автопат извршувала службени задачи од областа на безбедност во сообраќајот на Коридорот 10 (на релација Табановце-Гевгелија), но и на дел од Коридорот 8 (на релација Скопје-Гостивар, се до превојот „Стража“), па оспорената ознака не се однесувала само на странски државјани кои со моторни возила се движат низ Република Македонија, туку и на граѓани на Република Македонија.
3. Судот на седницата утврди дека целината на член 4 став 1 од Правилникот гласи:
„Службените патнички автомобили на Единицата за безбедност на патниот сообраќај на автопат се обоени со бела боја и имаат:
1. ознака „POLICE“ испишана со сини букви од двете бочни страни со димензии на ознаката 1200 мм х 135 мм. (Образец бр.3);
2. на капакот над моторот поставен е амблем на Сообраќајната полиција во форма на штит, со димензии 500 мм. х 500 мм., што е со сина основа и на него со бели букви се отпечатени зборовите „РЕПУБЛИКА МАКЕДОНИЈА“ и „REPUBLIC OF MACEDONIA“, а под нив се отпечатени зборовите „СООБРАЌАЈНА ПОЛИЦИЈА“, под кои, во средината на амблемот, е сместен симболот на Сообраќајната полиција и под него се отпечатени зборовите „TRAFFIC POLICE“ (Образец бр.4);
3. на капакот на задниот дел има ознака „ПОЛИЦИЈА“ испишана со сини букви со димензии на ознаката 140 мм. х 90 мм.;
4. странично, по должината на автомобилот, се наоѓа лента со наизменично распоредени бои и сини коцки, при што ширината на лентата изнесува 280 мм., а коцките се со димензии 140 мм. х 140 мм. (Образец бр.5);
5. на задниот дел, над регистарската таблица се наоѓа лента со наизменично распоредени бели и сини коцки, при што лентата е со димензии 1200 мм. х 140 мм., а коцките се со димензии 70 мм. х 70 мм.;
6. странично, по должината на автомобилот, како и предниот и задниот браник се наоѓа бела лента, која е со ширина од 60 мм.;
7. вградено ротационо или треперливо сино светло на највисокото место на возилото и
8. вграден уред за давање звучни знаци во низа тонови со различна висина.“
4. Според ставот 1 од Амандманот V со кој е заменет членот 7 од Уставот, „на целата територија во Република Македонија и во нејзините меѓународни односи службен јазик е македонскиот јазик и неговото кирилско писмо.“
Согласно членот 110 алинеите 1 и 2 од Уставот, Уставниот суд на Република Македонија одлучува за согласноста на законите со Уставот и одлучува за согласноста на другите прописи и на колективните договори со уставот и со законите.
Во конкретниот случај, од целината на член 4 став 1 на Правилникот Судот утврди дека произлегува оспорената ознака „POLICE“ да е испишана на двете бочни страни на службените патнички автомобили на сообраќајната полиција (точка 1), потоа дека амблемот со зборовите „РЕПУБЛИКА МАКЕДОНИЈА“ и „СООБРАЌАЈНА ПОЛИЦИЈА“, како и со зборовите „REPUBLIC OF MACEDONIA“ и „TRAFFIC POLICE“ е поставен на капакот над моторот (точка 2) и дека ознака „ПОЛИЦИЈА“ е испишана на капакот на задниот дел (точка 3). Според тоа, Судот утврди дека на службениот патнички автомобил на сообраќајната полиција има ознаки и амблем испишани со зборови на македонски јазик и на неговото кирилско писмо, како и зборови испишани со латинично писмо.
Со оглед на тоа што на службениот патнички автомобил на сообраќајната полиција има ознаки и амблем испишани со зборови на македонски јазик и на неговото кирилско писмо, Судот оцени дека членот 4 став 1 точка 1 во делот: „POLICE“ е ознака која е транскрипт на зборовите од македонски јазик и напишани на самото службено возило со кирилско писмо „ПОЛИЦИЈА“, поради што оцени дека оспорената одредба од Правилникот е во согласност со Амандман V став 1 на Уставот.
5. Врз основа на изнесеното, Судот одлучи како во точката 1 од ова решение.
6. Ова решение Судот го донесе во состав од претседателот на Судот Бранко Наумоски и судиите: д-р Наташа Габер-Дамјановска, Елена Гошева, Исмаил Дарлишта, Никола Ивановски, Јован Јосифовски, Сали Мурати, д-р Гзиме Старова и Владимир Стојаноски.
У.бр.202/2012
24 април 2013 г.
С к о п ј е
ПРЕТСЕДАТЕЛ
на Уставниот суд на Република Македонија
Бранко Наумоски