На 31 јануари (среда), со почеток во 9:30 часот, Уставниот суд ќе ја одржи 4. седница со дневен ред за кој се предвидени четири иницијативи за оценување на уставност и законитост.
Дополнително, Судот ќе одлучува по 4 предлози за нацрт-одлуки.
1. Реферат У.бр.98/2022
Oспорен: Законот за социјална сигурност за стари лица
– Член 2, член 3 и член 4 од Правилникот за начинот на утврдување на состојбата и видот на приходите, имотот и имотните права на подносителот и неговиот брачен другар или лице со кое живее во вонбрачна заедница, образецот на барањето и потребната документација за остварување на правото на социјална сигурност на старите лица
-Решение УП.бр.1702-2488/21 на Меѓуопштинскиот Центар за социјална работа Скопје-Кисела Вода
Подносител на иницијативата: Добра Петковска од Скопје
Од наводите во иницијативата:
Подносителката наведува дека дел од оспорените одредби се во спротивност со член 36 став 1 од Уставот, укажувајќи дека живее во брачна заедница, а не во вонбрачна како што е наведено во оспореното Решение. Според подносителот на иницијативата Законот е во спротивност со членовите 9 став 2, 36 став 1 и 51 став 1 од Уставот.
2. Реферат У.бр.145/2023
Оспорен акт: Правилникот за формата и содржината на прекршочниот платен налог („Службен весник на Република Северна Македонија“ бр.285/22).
Доносител на актот: Министерот за финансии
Подносител на иницијативата: Кренар Лога
Се оспорува рокот на објавувањето на актот во Службен весник, како спротивен на Уставот. Во иницијативата подносителот наведува дека оспорениот акт е неуставен бидејќи со него е повреден членот 52 од Уставот, кој утврдува дека законите и другите прописи се објавуваат во Службен весник на Република Северна Македонија „најдоцна во рок од седум дена од денот на нивното донесување”.
3. Реферат У.бр.184/2023
Оспорен акт: Упатството за царинска вредност 01-074865/16-0002 од 01.06.2018година и Корисничкото упатство за пребарување во каталогот бр. 01-049268/18-0002 од 21.06.2018 донесени од директорот на Царинската управа на Република Северна Македонија
Подносител: Адвокат Зоран Величковски од Скопје
Од наводите во иницијативата:
Подносителот го оспорува тоа што на физичките и правните лица им се наметнува обврска увозните давачки за употребувани возила да ги плаќаат исклучиво со примена на податоците од германскиот каталог SchwackeNet, а тие не се објавени во Службен весник на Република Северна Македонија.
4. Реферат У.бр.205/2023
Оспорен акт: Одлука за поништување на постапката за доделување на договор за воспоставување на јавно приватно партнерство за проектирање, изградба, финансирање, стопанисување и пренос на мала хидроцентрала на водоснабдителен систем за водоснабдување на Општина Неготино, донесена од Советот на Општина Неготино на седницата одржана на 22.11.2023 година, број 08-841/3 од 22.11.2023 година („Службен гласник на Општина Неготино” бр.18/2023).
Подносители: Друштво за проектирање и одржување на објекти, производство, трговија и услуги РЕСУРС ЛТДИ извоз-увоз ДООЕЛ Кавадарци и Друштво за производство трговија и услуги ХЕМ-АЛИЈАНС ДООЕЛ Неготино
Од наводите во иницијативата:
Според подносителите на иницијативата Советот на Општина Неготино немал законска надлежност да ја поништува постапката за избор на најповолен понудувач, туку само да дава согласност на Одлуката за избор на најповолен понудувач. Исто така, тие сметаат дека и градоначалнкот на Општината ги пречекорил своите овластувања бидејќи ја доставил оспорената одлука до најповолниот понудувач (подносителите на иницијативата) со што им го ускратил правото на жалба на понудувачот спротивно на член 15 од Уставот со кој се гарантира правото на жалба.
Во дополнувањето на иницијативата доставено до Судот, подносителите наведуваат дека Советот на Општина Неготино нема законска надлежност да ја донесе оспорената одлука туку ЈП Комуналец Неготино и сметаат дека истата е во спротивност и со Законот за концесии и јавно приватно партнерство, Законот за јавни набавки, Законот за локална самоуправа, како и со Статутот и Деловникот за работа на Советот на Општина Неготино.