Уставниот суд денеска ја одржа 14. седница на која се дискутираше по четири иницијативи за оценување на уставност и законитост и одлучи:
1. Реферат У.бр.9/2021 и 25/2021
Судијата- известител предложи поведување на постапка за Законот за решавање на спорот помеѓу Владата на Република Сверна Македонија и Макпетрол АД Скопје, но не го доби потребното мнозинство и поради тоа овој предмет повторно ќе биде ставен на гласање на следната седница.
Подносители на инцијативите: Светски Македонски Конгрес преку претседателот Тодор Петров и Политичка партија „Левица“ преку претседателот проф. д-р Димитар Апасиев.
2. Реферат У.бр.86/2021
Предлогот за поведување на постапка за член 6 став 3 од Законот за судските такси не го доби потребното мнозинство и овој предмет ќе биде ставен на дневен ред на следната седница.
Подносител на иницијативата: Бобан Богдановски, адвокат од Скопје
3.Реферат У.бр.46/2022
Ја отфрли иницијативата за член 30 во делот „министерот за стопанство и министерот за урбанизам, градежништво, сообраќај и екологија“ од Законот за складирање и заштита од запални течности и гасови бидејќи согласно член 27 алинеја 1 од Деловникот е ненадлежен да одлучува за ова прашање. Имено, наводите се сведуваат на барање на постапување на Уставниот суд, што не е во негова надлежност, туку во надлежност на законодавецот кој ги креира прописите, ги менува и дополнува и воедно врши и технички и правки и корекции на прописите кои ги донесува.
Подносител на иницијативата: Игорчо Точев од Кочани
Содржина на оспорената одредба:
„Со изменување на Законот за складирање и заштита од запаливи течности и гасови објавен во „Службен весник на Република Македонија“ број 12 од 4 март 1993 година, е направена измена во член 30 зборовите „републичкиот секретар за внатрешни работи“, „републичкиот секретар за индустрија и трговија“, „републичкиот секретар за урбанизам, станбени и комунални прашања“ се заменуваат со зборовите „министерот за внатрешни работи“, „министерот за стопанство“ и „министерот за урбанизам градежништво сообраќај и екологија“.
4. Реферат У.бр.109/2022
Поведе постапка за оценување на уставност по иницијатива на Игорчо Точев за членот 152 став 1 точка 2 во делот „став (4)„, член 154 став 1 точка 2) во делот „став (4)”, член 156 став 1 точка 8) во делот „став (4)” и член 158 став 1 точка 4) во делот „став (4)” од Законот за градење („Службен весник на Република Македонија”, број 130/2009, 124/2010, 18/2011, 36/2011, 54/2011, 13/2012, 144/2012, 25/2013, 79/2013, 137/2013, 163/2013, 27/2014, 28/2014, 42/2014, 115/2014, 149/2014, 187/2014, 44/2015, 129/2015 (две измени), 217/2015, 226/2015, 30/2016, 31/2016, 39/2016, 71/2016, 132/2016, 35/2018, 64/2018 и 168/2018 и „Службен весник на Република Северна Македонија” број 244/2019, 18/2020, 279/2020 и 227/2022).
По сопствена иницијатива Судот поведе постапка за оценување на уставноста на член 154 став 1 точка 2) во делот „став (4),”, член 156 став 1 точка 8) во делот „став (4)” и член 158 став 1 точка 4) во делот „став (4),” содржани во истиот закон. Судот поведе постапка бидејќи одредбите треба да бидат прецизни, недвосмислени и јасни и само како такви да ја гарантираат правната сигурност на граѓаните како негов составен дел, што не е сторено во конкретниот случај од страна на законодавецот. Имајќи предвид дека во наведените оспорени членови од Законот за градење како упатувачка норма стои „став (4)”, а треба да стои „став (7)”, според Судот не е во согласност со принципот на владеењето на правото.
Подносител на иницијативата: Игорчо Точев
Поради оправдано отсуство на судијата-известител, м-р Фатмир Скендер на денешната седница предметите У.бр.32/2022, У.бр.144/2019 и 114/2022 ќе бидат ставени на дневен ред на наредната седница.