Во Уставниот суд денеска се одржа работилница посветена на изготвување правни резимеа на одлуките на Судот, со цел унапредување на правната аргументација, стандардизација на содржината и зајакнување на институционалната транспарентност.
Обуката ја водеше Мартин Сопронов, виш правен експерт во рамки на ЕУ проектот „Зајакнати капацитети на Уставниот суд за оценување на уставноста и законитоста на донесените нормативни акти и заштита на основните права“.
Во рамки на работилницата беа презентирани насоки и шаблони за подготовка на правни резимеа на одлуките на Уставниот суд, при што учесниците имаа можност преку практична работа и анализа на конкретни случаи да се запознаат со методологијата за јасно, прецизно и правно аргументирано сумирање на судските одлуки.
Посебен акцент беше ставен на унапредување на квалитетот на правната комуникација, олеснување на пристапот на јавноста и стручната фела до уставно-судската пракса, како и на развивање на унифициран пристап при подготовка на правни резимеа.
Работилницата е дел од активностите насочени кон јакнење на институционалните капацитети и приближување на работата на Уставниот суд до јавноста преку појасна и подостапна презентација на неговите одлуки.
