У.бр.224/2011

1. СЕ ПОВЕДУВА постапка за оценување на уставноста на членот 9 ставови 1 и 2 од Правилникот за формата и содржината на регистарските таблици и на пробните таблици на возилата и начинот и постапката на нивно издавање, број 12.1-60305/1 од 3 август 2011 година, донесен од министерот за внатрешни работи (“Службен весник на Република Македонија” број 107/2011).

2. НЕ СЕ ПОВЕДУВА постапка за оценување на уставноста на членот на член 2 став 1, член 3 став 1, член 4 став 1, член 5 став 1, член 6 став 1, член 7 став 1 и член 8 став 4 точки 1 и 2 од Правилникот, означен во точката 1 од ова решение.

3. Дарко Ѓорѓиев од Скопје, на Уставниот суд на Република Македонија, му поднесе иницијатива за поведување на постапка за оценување на уставноста на одредбите од актот, означен во точката 1 од решението.

Според наводите од иницијативата со така пропишаните оспорени одредби од Правилникот, службеното кирилско писмо било ставено како помошен, спореден, второстепен елемент во јавната ознака, а со тоа во подредена, второстепена, положба во однос на латинското писмо. Ова од причини што кирилското писмо според оспорените правилнички решенија, било десеткратно помало и на несуштествено место, за разлика од латинското писмо кое било видливо, доминантно, со основна функција на регистарските таблички.

Оттука, според наводите од иницијативата, доносителот на актот при уредувањето на оспорените одредби од Правилникот, не го почитувал членот 7 од Уставот, односно дека “Во Република Македонија службен јазик е македонскиот јазик и неговото кирилско писмо”. Со иницијативата подносителот на иницијативата всушност го цитира ставот 1 од членот 7 од Уставот, кој член од Уставот, со Амандманот V, е заменет во целина.

Понатаму со иницијативата, се укажува дека согласно Меѓународната конвенција за сообраќај на патиштата, прифатена со Одлука на Владата на Република Македонија, донесена на 28 јули 1993 година (“Службен весник на Република Македонија” бр. 52/93), конкретно точката 1 на Прилог 2 на Конвенцијата, според кој регистарскиот број на автомобил во меѓународниот сообраќај треба да е составен од арапски броеви и големи букви на латиница, како и можност да се употребуваат други броеви или букви, но регистарскиот број треба да биде повторен со арапски броеви и со големи букви на латиница, Уставниот суд, би можел на доносителот на актот, да му предложел можни решенија, како одредувањето на употреба само на одреден број на букви од службеното македонско кирилско писмо во регистарските таблички и тоа буквите A, B, E, S, J, K, M, H, O, R, S, T, U, X, кои немало да претставуваат пречка за учеството на македонските возила во меѓународниот сообраќај.

4. Судот на седницата утврди дека оспорениот член 2 став 1 од Правилникот определува дека регистарската таблица за моторно и приклучно возило е изработено од метал прекриена со ретрорефлектирачка фолија во бела боја на која со црни букви и броеви е испишано: буквена ознака на регистрационото подрачје на латиница, регистарски број составен од четири букви и променлива буквена ознака составена од две букви на латиница. Регистарската таблица содржи сино поле во кое во долниот дел е испишана националната авто ознака на Република Македонија, а во горниот дел е оставен простор за ознаката на Европска унија. Помеѓу буквената ознака на регистрационото подрачје и регистарскиот број на возилото е поставена црвена правоаголна подлога, на која со жолти букви се испишани буквената ознака на регистрационото подрачје и променливата буквена ознака, на кирилица. На горната, долната, левата и десната страна на регистарската таблица поставена е права црна испакната линија со стандарден радиус на аглите (R 12).

Со оспорениот член 3 став 1 од Правилникот, е определено дека регистарската таблица за привремено регистрирано моторно и приклучно возило е изработена од метал прекриена со ретрорефлектирачка фолија во бела боја, на која со црни букви и броеви е испишано: буквената ознака на регистрационото подрачје на латиница, регистарскиот број составен од четири броеви, буквена ознака ,,А“ која не е променлива и ознака на годината за која важи регистрацијата. Регистарската таблица содржи сино поле во кое во долниот дел е испишана националната авто ознака на Република Македонија, а во горниот дел е оставен простор за ознаката на Европска унија. Помеѓу буквената ознака на регистрационото подрачје и регистарскиот број на возилото е поставена црвена правоаголна подлога, на која со жолти букви се испишани буквената ознака на регистрационото подрачје и променливата буквена ознака, на кирилица. На горната, долната, левата и десната страна на регистарската таблица поставена е права црна испакната линија со стандарден радиус на аглите (R 12).

Според оспорениот член 4 став 1 од Правилникот, регистарската таблица за трактор е изработена од метал, прекриена со ретрорефлектирачка фолија во бела боја на која со зелени букви и броеви е испишано: буквена ознака на регистрационото подрачје на латиница, регистарски број составен од четири броеви и променлива ознака составена од две букви на латиница. Регистарската таблица содржи сино поле во кое во долниот дел е испишана националната авто ознака на Република Македонија, а во горниот дел е оставен простор за ознаката на Европската унија. Помеѓу буквената ознака на регистрационото подрачје и регистарскиот број на возилото е поставена црвена правоаголна подлога, на која со жолти букви се испишани буквената ознака на регистрационото подрачје и променливата буквена ознака, на кирилица. На горната, долната, левата и десната страна на регистарската таблица поставена е права зелена испакната линија со стандарден радиус на аглите (R 12).

Според оспорениот член 5 став 1 од Правилникот, регистарската таблица за работна машина и мото култиватор е изработена од метал, прекриена со ретрорефлектирачка фолија во бела боја на која со жолти букви и броеви е испишано: буквена ознака на регистрационото подрачје на латиница, регистарски број составен од четири броеви и променлива буквена ознака составена од две букви на латиница. Регистарската таблица содржи сино поле во кое во долниот дел е испишана националната авто ознака на Република Македонија, а во горниот дел е оставен простор за ознаката на Еврoпската унија. Помеѓу буквената ознака на регистрационото подрачје и регистарскиот број на возилото е поставена црвена правоаголна подлога, на која со жолти букви се испишани буквената ознака на регистрационото подрачје и променливата буквена ознака, на кирилица. На горната, долната, левата и десната страна на регистарската таблица поставена е права жолта испакната линија со стандарден радиус на аглите (R 12).

Со оспорениот член 6 став 1 од Правилникот е определено дека регистарската таблица за моторно и приклучно возило кое не ги исполнува законски пропишаните услови во однос на димензиите (должина, ширина, висина) односно чија најголема дозволена маса е поголема од 40 тони, односно чија сопствена маса е поголема од дозволените осни оптоварувања, е изработена од метал прекриена со ретрорефлектирачка фолија во бела боја на која со црвени букви и броеви е испишано: буквена ознака на регистрационото подрачје на латиница, регистарски број составен од четири броеви и променлива буквена ознака составена од две букви на латиница. Регистарската таблица содржи сино поле во кое во долниот дел е испишана националната авто ознака на Република Македонија, а во горниот дел е оставен простор за ознаката на Европската унија.
Помеѓу буквената ознака на регистрационото подрачје и регистарскиот број на возилото е поставена црвена правоаголна подлога, на која со жолти букви се испишани буквената ознака на регистрационото подрачје и променливата буквена ознака, на кирилица. На горната, долната, левата и десната страна на регистарската таблица поставена е права црвена испакната линија со стандарден радиус на аглите (R 12).

Според оспорениот член 7 став 1 од Правилникот, регистарската таблица за моторни возила постари од 35 години е изработена од метал, прекриена со ретрорефлектирачка фолија во бела боја на која со сиви букви и броеви е испишано: националната авто ознака ,,МК“, регистарски број составен од четири броеви, буквената ознака ,,H“ која не е променлива и вертикално поставен број ,,35“. Регистарската таблица содржи сино поле во кое во долниот дел е испишана нациналната авто ознака на Република Македонија, а во горниот дел е оставен простор за ознаката на Европската унија. Помеѓу буквената ознака на регистрационото подрачје и регистарскиот број на возилото е поставена црвена правоаголна подлога, на која со жолти букви се испишани буквената ознака на регистрационото подрачје и променливата буквена ознака, на кирилица. На горната, долната, левата и десната страна на регистарската таблица поставена е права сива испакната линија со стандарден радиус на аглите(R 12).

Според оспорениот член 8 став 4 точки 1 и 2 од Правилникот е определено дека буквените ознаки на дејноста на претставништвото односно на статусот на лицата во тие претставништва, на регистарските таблици се следните:

1. „CMD” за возило во сопственост на дипломатски и конзуларни претставништва, на мисии на странски држави и меѓнародни организации во Република Македонија, што го користи шефот на дипломатското претставништво или мисија (Образец бр. 25);

2. „CD“ за возило што го користи лице со дипломатски статус (Образец бр. 26);

Со оспорениот член 9 став 1 од Правилникот е определено дека пробните таблици за моторни и приклучни возила се изработени од подебела хартија во бела боја на која со црни букви и броеви е испишано: буквена ознака на регистрационото подрачје на латиница, регистарски број со ставен од три броеви и променлива ознака составена од два броја. Помеѓу буквената ознака на регистрационото подрачје и регистарскиот број на возилото поставен е натпис „PROBA“ вертикално испишан на налепница со пет жолти и пет црвени полиња. На горната, долната, левата и десната страна на регистарската таблица поставена е права црна линија со стандарден радиус на аглите (R 12), а според оспорениот став 2 од истиот член од Правилникот пробните таблици за моторни и приклучни возила со кои правните лица што се занимаваат со производство и/или пуштање на пазар на возила, врз основа на посебна потврда издадена од Министерството за внатрешни работи вршат пробно возење, се изработени од метал прекриен со ретрорефлектирачка фолија во бела боја, на која со црни букви и броеви е испишано: буквена ознака на регистрационото подрачје на латиница, регистарски број составен од три броеви и променлива ознака составена од два броја. Помеѓу буквената ознака на регистрационото подрачје и регистарскиот број на возилото поставен е натпис ,,PROBA“ вертикално испишан на налепница со пет жолти и пет црвени полиња. На горната, долната, левата и десната страна на регистарската таблица поставена е права црна линија со стандарден радиус на аглите (R 12).

5. Според ставот 1 од Амандманот V со кој е заменет членот 7 од Уставот, на целата територија во Република Македонија и во нејзините меѓународни односи службен јазик е македонскиот јазик и неговото кирилско писмо.

Согласно членот 110 алинеите 1 и 2 од Уставот, Уставниот суд на Република Македонија одлучува за согласноста на законите со Уставот и одлучува за согласноста на другите прописи и на колективните договори со уставот и со законите.

Според член 118 од Уставот, меѓународните договори што се ратификувани во согласност со Уставот се дел од внатрешниот правен поредок и не можат да се менуваат со закон.

Според член 36 од Меѓународната конвенција за сообраќај на патиштата, прифатена со Одлука на Владата на Република Македонија, донесена на 28 јули 1993 година (“Службен весник на Република Македонија” бр.52/93), секој автомобил во меѓународен сообраќај треба да носи, напред и назад, свој регистарски број, а мотоциклите мора да го имаат овој број само назад. Составувањето и поставувањето на регистарскиот број наведен во овој член треба да се усогласи со одредбите на Прилогот 2 од Конвенцијата.

Според точката 1 на Прилог 2 на Конвенцијата, регистарскиот број треба да е составен од броеви или од броеви и букви. Броевите треба да бидат арапски, а буквите – големи букви на латиница. Меѓутоа, можат да се употребуваат други броеви или букви, но регистарскиот број треба да биде повторен со арапски броеви и со големи букви на латиница.

Од наведените одредби на Конвенцијата произлегува дека државите потписнички само за моторните возила во меѓународниот сообраќај се обврзуваат составувањето и поставувањето на регистарските таблички на возилата да го вршат на начин како што е опишан во образецот 2 од Конвенцијата односно да бидат испишани со арапски броеви и со големи букви на латиница, со можност да се напишат и со други броеви и букви, при што регистарскиот број треба да биде повторен со арапски броеви и со големи букви на латиница. Тоа значи дека Конвенцијата не ја попречува државата – потписничка, означувањето на регистарските таблици да го врши на својот службен јазик и писмо.

Со Правилникот за формата и содржината на регистарските таблици и на пробните таблици на возилата и на начинот и постапката на нивно издавање, број 12.1-60305/1 од 3 август 2011 година, донесен од министерот за внатрешни работи (“Службен весник на Република Македонија” број 107/2011), се пропишуваат формата и содржината на регистарските таблици и на пробните таблици на возилата, како и начинот и постапката на нивно издавање.

Со оспорениот член 2 став 1 од Правилникот, е уредена изработката на регистарската таблица за моторно и приклучно возило, односно материјалот, бојата и впишаната содржина на регистарските таблици.

Од содржината на оваа оспорена одредба, произлегува дека регистарската таблица содржи буквена ознака на регистрационото подрачје на латиница, регистарски број составен од четири броеви и променлива буквена ознака составена од две букви на латиница. Исто така, регистарската таблица содржи сино поле во чиј долен дел е испишана националната авто ознака на Република Македонија, со оставен простор во горниот дел за ознаката на Европската унија. Помеѓу буквената ознака на регистрационото подрачје и регистарскиот број на возилото е поставена црвена правоаголна подлога, на која со жолти букви се испишани буквената ознака на регистрационото подрачје и променливата буквена ознака, на кирилица.

Со оспорениот член 3 став 1 од Правилникот, е уредена изработката на регистарската таблица за привремено регистрирано моторно и приклучно возило, односно материјалот, бојата и впишаната содржина на регистарските таблици.

Од содржината на оваа оспорена одредба, произлегува дека регистарската таблица содржи буквена ознака на регистрационото подрачје на латиница, регистарски број составен од четири броеви, буквена ознака “А” која не е променлива и ознака на годината за која важи регистрацијата. Исто така, регистарската таблица содржи сино поле во чиј долен дел е испишана националната авто ознака на Република Македонија, со оставен простор во горниот дел за ознаката на Европската унија. Помеѓу буквената ознака на регистрационото подрачје и регистарскиот број на возилото е поставена црвена правоаголна подлога, на која со жолти букви се испишани буквената ознака на регистрационото подрачје и променливата буквена ознака, на кирилица.

Со оспорениот член 4 став 1 од Правилникот, е уредена изработката на регистарската таблица за трактор, односно материјалот, бојата и впишаната содржина на регистарските таблици.

Од содржината на оваа оспорена одредба, произлегува дека регистарската таблица содржи буквена ознака на регистрационото подрачје на латиница, регистарски број составен од четири броеви и променлива буквена ознака составена од две букви на латиница. Исто така, регистарската таблица содржи сино поле во чиј долен дел е испишана националната авто ознака на Република Македонија, со оставен простор во горниот дел за ознаката на Европската унија. Помеѓу буквената ознака на регистрационото подрачје и регистарскиот број на возилото е поставена црвена правоаголна подлога, на која со жолти букви се испишани буквената ознака на регистрационото подрачје и променливата буквена ознака, на кирилица.

Со оспорениот член 5 став 1 од Правилникот, е уредена изработката на регистарската таблица за работна машина и мотокултиватор, односно материјалот, бојата и впишаната содржина на регистарските таблици.

Од содржината на оваа оспорена одредба, произлегува дека регистарската таблица содржи буквена ознака на регистрационото подрачје на латиница, регистарски број составен од четири броеви и променлива буквена ознака на латиница. Исто така, регистарската таблица содржи сино поле во чиј долен дел е испишана националната авто ознака на Република Македонија, со оставен простор во горниот дел за ознаката на Европската унија. Помеѓу буквената ознака на регистрационото подрачје и регистарскиот број на возилото е поставена црвена правоаголна подлога, на која со жолти букви се испишани буквената ознака на регистрационото подрачје и променливата буквена ознака, на кирилица.

Со оспорениот член 6 став 1 од Правилникот, е уредена изработката на регистарската таблица за моторно и приклучно возило кое не ги исполнува законски пропишаните услови, односно материјалот, бојата и впишаната содржина на регистарските таблици.

Од содржината на оваа оспорена одредба, произлегува дека регистарската таблица содржи буквена ознака на регистрационото подрачје на латиница, регистарски број составен од четири броеви и променлива буквена ознака на латиница. Исто така, регистарската таблица содржи сино поле во чиј долен дел е испишана националната авто ознака на Република Македонија, со оставен простор во горниот дел за ознаката на Европската унија. Помеѓу буквената ознака на регистрационото подрачје и регистарскиот број на возилото е поставена црвена правоаголна подлога, на која со жолти букви се испишани буквената ознака на регистрационото подрачје и променливата буквена ознака, на кирилица.

Со оспорениот член 7 став 1 од Правилникот, е уредена изработката на регистарската таблица за моторни возила со статус на возила со мезејска вредност (олдтајмери), односно материјалот, бојата и впишаната содржина на регистарските таблици.

Од содржината на оваа оспорена одредба, произлегува дека на регистарската таблица за моторните возила постари од 35 години е испишана националната авто ознака “MK”, регистарски број составен од четири броеви, буквена ознака “Н”, која не е променлива и вертикално поставен број “35”. Исто така, регистарската таблица содржи сино поле во чиј долен дел е испишана националната авто ознака на Република Македонија, со оставен простор во горниот дел за ознаката на Европската унија. Помеѓу буквената ознака на регистрационото подрачје и регистарскиот број на возилото е поставена црвена правоаголна подлога, на која со жолти букви се испишани буквената ознака на регистрационото подрачје и променливата буквена ознака, на кирилица.

Со членот 17 од Правилникот е уредено дека регистарските таблици предвидени со овој правилник се изработуваат согласно меѓународниот стандард ISO 7591-1982.

Во интерес на рационално постапување и ненаметнување обврска на граѓаните за промена на постојните регистарски таблици, со членот 24 од Правилникот е определено дека регистарските таблици ќе се издаваат на барање на граѓаните, а задолжително само во три случаи и тоа при прва регистрација на моторно и приклучно возило на територијата на Република Македонија, при промена на регистрационо подрачје и при замена на изгубена регистарска таблица, под услови и начин утврдени со закон.

Ново уредената форма и содржина на регистарските таблици со овој правилник, всушност претставува континуитет во однос на претходно уредената форма и содржина на регистарските таблици, со надоградување на капацитетот на постојните регистарски таблици во кои со ново пропишаните форми и обрасци е впишана и националната ознака на Република Македонија, со оставен простор за ознаката на Европската унија. Во овие рамки треба да се има предвид Меѓународната Конвенција за сообраќај на патиштата, прифатена со Одлука на Владата на Република Македонија, донесена на 28 јули 1993 година (“Службен весник на Република Македонија” бр. 52/93), каде точката 1 од Прилогот 2 на Конвенцијата кој е во врска со членот 36 од Конвенцијата, определува дека регистарскиот број на автомобил во меѓународниот сообраќај треба да е составен од арапски броеви и големи букви на латиница, како и можност да се употребуваат други броеви или букви, но регистарскиот број треба да биде повторен со арапски броеви и со големи букви на латиница. Тоа значи дека дадена е можност на земјите на регистарските таблици да впишуваат и други броеви или букви, но сепак регистарскиот број треба да биде повторен со арапски броеви и со големи букви на латиница.

Република Македонија, прифаќајќи ја Меѓународната Конвенција за сообраќај на патиштата, го почитува принципот на меѓународна препознатливост на возилата, користејќи го латиничното писмо за означување на регистрационите подрачја, со повторена ознака на кирилица, што е во функција на непречена меѓународна контрола, евидентирање и потрага по моторни возила од Република Македонија, согласно воспоставената комуникација на меѓународните полициски организации.

Имајќи ја предвид Меѓународната Конвенција за сообраќај на патиштата прифатена од страна на Република Македонија, фактот што регистарските таблици претставуваат јавни ознаки и дека како такви се составен дел не само на јавната комуникација во Републиката, туку и надвор од неа во меѓународниот сообраќај, а и со оглед дека со погоре наведените оспорени одредби од Правилникот, не се пропишува содржина на регистарските таблици со испишување на буквените ознаки исклучиво со латинично писмо, туку пропишуваат дека буквената ознака на регистрационото подрачје и променливата буквена ознака, се испишани и на кирилично писмо на црвена правоаголна подлога со жолти букви, на кој начин е овозможен третман на возилата од Република Македонија во странство согласно меѓународно воспоставените стандарди, Судот оцени дека изгледот на регистарските таблици пропишан со оспорените одредби од членовите 2 став 1, 3 став 1, 4 став 1, 5 став 1, 6 став 1 и член 7 став 1, е уреден на начин кој е во согласност со наведената Меѓународна Конвенција и не е спротивен на ставот 1 од Амандманот V со кој е заменет членот 7 од Уставот Уставот на Република Македонија.

Со членот 8 став 1 од Правилникот, е уредена изработката и содржината на регистарската таблица за моторно и приклучно возило на дипломатски и конзуларни претставништва и мисии на странски држави и меѓународни организации во Република Македонија и нивниот персонал, односно дека регистрските таблици за овие субјекти содржи национална ознака “МК“, бројчана ознака на земјата од која претставништвото е регистрирано во Република Македонија, буквена ознака на дејноста на претставништвото односно на статусот на лицата во тие претставништва, регистарски број на возилото и годината за која важи регистрацијата.

Со оспорениот став 4 точки 1 и 2 од членот 8 од Правилникот, е уредено дека буквените ознаки на дејноста на претставништвото односно на статусот на лицата во тие претставништва, на регистарските таблици се „CMD” за возило во сопственост на дипломатски и конзуларни претставништва, на мисии на странски држави и меѓнародни организации во Република Македонија, што го користи шефот на дипломатското претставништво или мисија и „CD“ за возило што го користи лице со дипломатски статус.

Од содржината на целината на членот 8 од Правилникот и посебно неговите оспорени одредби, произлегува дека со овој член е уредена изработката и содржината на регистарските таблици за моторно и приклучно возило на дипломатски и конзуларни претставништва, како и на мисии на странски држави и меѓународни организации во Република Македонија и на нивниот персонал, односно дека дека регистарските таблици за овие субјекти покрај национална ознака “МК“, содржи и буквени ознаки на дејноста на претставништвото односно на статусот на лицата во тие претставништва на латиница.

По однос на овие оспорени одредби од Правилникот, Судот оцени дека тие не можат уставно да се проблематизираат од аспект на употребеното латинично писмо на буквените ознаки содржани на регистарските таблици, имајќи предвид дека во случајов станува збор за регистарски таблици на возила кои се на располагање на субјекти кои се третираат како екстериторијалност, па оттука секое дипломатско возило претставува ектериторијален дел на државата која има дипломатско седиште во Република Македонија.

Со оспорениот член 9 став 1 од Правилникот, е уредена изработката и содржината на пробните таблици за моторни и приклучни возила. Според оваа оспорена одредба пробната таблица е изработена од подебела хартија во бела боја, на која со црни букви и броеви е испишана буквената ознака на регистрационото подрачје на латиница, регистарски број составен од три броеви и променлива ознака составена од два броја. Помеѓу буквената ознака на регистрационото подрачје и регистарскиот број на возилото поставен е натпис ,,PROBA“ вертикално испишан на налепница со пет жолти и пет црвени полиња.

Со оспорениот член 9 став 2 од Правилникот, е уредена изработката и содржината на пробните таблици за моторни и приклучни возила со кои правните лица што се занимаваат со производство и/или пуштање на пазар на возила, врз основа на посебна потврда издадена од Министерството за внатрешни работи вршат пробно возење. Според оваа оспорена одредба пробните таблици се изработени од метал прекриен со ретрорефлектирачка фолија во бела боја, на која со црни букви и броеви е испишано: буквена ознака на регистрационото подрачје на латиница, регистарски број составен од три броеви и променлива ознака составена од два броја. Помеѓу буквената ознака на регистрационото подрачје и регистарскиот број на возилото поставен е натпис ,,PROBA“ вертикално испишан на налепница со пет жолти и пет црвени полиња.

Според членот 15 од Правилникот пробните таблици за моторни и приклучни возила се издаваат привремено при купување на ново возило или користено (половно) возило, до неговата регистрација.

Од анализата на оспорениот член 9 ставови 1 и 2 од Правилникот, произлегува дека во содржинат на пробните регистарски таблици, буквените ознаки на регистрационото подрачје, се испишани само на латиница, како и натпис “PROBA” на македонски јазик но, со латинично писмо.

Со оглед на тоа што оспорените одредби од членот 9 ставови 1 и 2 од Правилникот, пропишуваат дека буквените ознаки за регистрацоното подрачје на регистарските таблички да биде напишана само на латинично писмо, како и натписот кој означува “проба”, да биде напишан само на латинично писмо – “PROBA”, а имајќи предвид дека регистарските таблички на моторните возила што учествуваат во сообраќајот претставуваат службени ознаки, Судот оцени дека оспорените одредби од членот 9 од Правилникот, не се во согласност со цитираниот Амандман од Уставот на Република Македонија, со оглед дека во случајов во службената ознака е исклучено кирилското писмо, како службено писмо во Републиката.

Со иницијативата, подносителот предлага, овој суд, на доносителот на актот, да му укажел на други можни решенија за пропишување на содржината на регистарските таблички, меѓутоа Уставниот суд нема надлежност да предлага и да креира можни решенија во закони и други прописи, што е во надлежност на други органи, туку да одлучува за согласноста на пропишаните закони со Уставот, како и да одлучува за согласноста на другите прописи и на колективните договори со Уставот и со законите.

6. Имајќи го предвид претходно наведеното, според Судот основано се постави прашањето за согласноста на оспорените одредби од членот 9 ставови 1 и 2 од Правилникот за формата и содржината на регистарските таблици и на пробните таблици на возилата и начинот и постапката на нивно издавање со цитираната одредба од Амандманот V со кој е заменет членот 7 од Уставот, а по однос на оспорените одредби од член 2 став 1, член 3 став 1, член 4 став 1, член 5 став 1, член 6 став 1, член 7 став 1 и член 8 став 4 точки 1 и 2 од Правилникот, Судот оцени дека не може да се постави прашањето за нивната согласност со цитираната одредба од Амандманот V со кој е заменет членот 7 од Уставот.

7. Поради горе изнесеното, Судот одлучи како во точките 1 и 2 од ова решение.

8. Ова решение Судот го донесе, во состав од претседателот на Судот Бранко Наумоски и судиите д-р Наташа Габер-Дамјановска, Елена Гошева, Исмаил Дарлишта, Никола Ивановски, Вера Маркова, Сали Мурати, д-р Гзиме Старова и Владимир Стојаноски.

У.Бр.224/2011
3 октомври 2012 година
Скопје

ПРЕТСЕДАТЕЛ
на Уставниот суд на Република Македонија
Бранко Наумоски